الربان وسام هركي يكتب الف مليون مبروك تكريم أبطال وادي العرب و لكن السؤال هنا مين يتطمن على باقي رجالة البحر المصريين بالكوكب؟
في البداية، لازم نقول الف حمد و شكر لله على سلامة كل رجالة سفينة وادي العرب الجدعان، من ربان السفينه و كبير المهندسين و كافه الضباط و المهندسين و البحارة وكل فرد من أفراد الطاقم.
السفينة اللي تم إستهدافها بثلاث مسيرات و حصل فيها حريق و قدر رجالتنا بفضل الله يسيطروا على الحريق و يرجعوا مصر سالمين غانمين، من غير ما حد فيهم يتعرض لأذى.
وده طبعاً مجهود كبير من رجالة مخلصين، رجالة بحر بجد ، ده مش غريب على أبناء الشركة الوطنية التابعة لدولتنا المصرية ، مش زي فلم القبطان عزوز او اي دور بتعمله الدرامه المصرية علي أن الساده الربابنه و الظباط و المهندسين مصدر للفكاهه و السخرية….
و الحقيقة لازم اقول إن استقبال معالي الفريق كامل الوزير ليهم بنفسه و تكريمهم حاجة تستحق كل التقدير والاحترام و بتأكد إن دولتنا المصرية مش بتنسى أبناءها و بتقدّر رجالتها اللي بيواجهوا الموت و المخاطر وبيؤدوا واجبهم في أصعب الظروف بأعالي البحار.
لكن يا جماعة الخير، بعد ما افتخرنا برجالتنا بالسفينة وادي العرب، لازم استغل الحدث ده و نقف عند نقطة مهمة جداً .
رجالة قطاع النقل البحري التجاري المصري مش موجودين على السفن المصرية بس يا سادة.
السادة الربابنة و كبار المهندسين و الضباط و المهندسين و البحارة المصريين موجودين في كل حتة في الكوكب و شغالين على سفن و شركات عالمية و متعددة الجنسيات، بل إن نسبه لا تقل من ٩٠ ٪ من البحاره المصريين شغالين في الشركات العالمية، مش في الشركات المصرية فقط.
يعني لما حضراتكم بتشوفوا في الأخبار أن سفينة أجنبية اتضربت بصاروخ أو مسيّرة، ممكن تلاقوا السفينة عليها طاقم متعدد الجنسيات و من ضمن الطاقم ده واحد أو اتنين أو تلاتة مصريين و ممكن أكتر.
دول برضه رجالتنا من رجال قطاع النقل البحري التجاري المصري اللي محدش بيسمع او يعرف عنهم حاجه.
و أنا هنا مش بقول الكلام ده عشان كل ما سفينة تتضرب نطالب بتكريم اللي عليها، لأ والله ، مش ده المقصود تماماً.
إنا بقول الكلام ده عشان الناس تفهم إن المصريين موجودين على معظم سفن دول العالم كله و إن معظم رجالة البحر المصريين بيتعرضوا و بيشوفوا مخاطر بل بيتضربوا بمسيرات و صواريخ اللي بتتعرض لها أطقم السفن الأجنبية، من صواريخ و مسيّرات و أمور أستثنائية محدش من اللي قاعدين في البر شافها و لا عاشها.
والسؤال هنا:
هل حد يعرف عنهم حاجة ؟ و مين بيتابعهم ؟
و لو حصل لهم حاجه مين بيطمن عليهم او على أهاليهم لما تحصل لهم حادثة قوية من صاروخ او مسيرة او لغم بحري او حتي لنش مسير ملغم؟
و ده بالضبط اللي خلاني أتكلم كتير خلال اخر ٣ سنين في الحلقات و عملت حملة مقالات في ديسمبر و يناير الماضي و دعمنا اعلام قطاع النقل البحري الربان سامي ابو سمره و الربان ممدوح الحملاوي و الربان أحمد حافظ و خبراء إستراتيجيين يعني قبل ما الأزمة تتفاقم و كمان في حلقة من شهر ستة اللي فات، عن ضرورة وجود غرفة أزمات دائمة يتم إستخدامها عند الحاجه لرجالة قطاع النقل البحري التجاري المصري.
وأنا زي ما بدعم بلدي بكل قوة و بكل شراسة في الضراء قبل السراء و زي ما كنت و مازالت و سأظل افتخر بكل انجاز بيتنفذ علي ارض بلدنا الغاليه و بكل مواطن و قائد بينفذ الإنجاز، لكن انا برضوا بتكلم من واقع خبراتنا و معرفتنا بطبيعة العمل البحري و عارفين و شايفين كويس فين القصور و من حبنا لبلدنا بنقول بكل صدق و إخلاص الحلول عشان تتنفذ لمصلحه مصرنا و شعبنا العظيم.
لا فرق معانا تهديدات اخوان و لا تهديدات لجان اجهزه معادية زمان و لا بيفرق معانا تهديدات شوية الهواه المعرضين و المنبطحين و المنتحلين دلوقتي، كل اللي بيفرق معانا بلدنا و شعبنا و كل شرفاء مؤسساتنا و أجهزتنا المخلصين اللي هنفضل ندعمهم لاخر حياتنا عشان نحافظ و نرتقي ببلدنا .
و عشان كده لازم أقول لكم مثال عن الهند و الفلببين بيعملوا ايه…..
لما سفينة يكون عليها طقم متعدد الجنسيات بيكون عليها بحارة هنود و فلبينيين و لما السفينة دي تتعرض لصاروخ أو مسيّرة، بتيجي النقابه الهندية و وزارة النقل الهندية عاملين جروب واتس اب فيه شخص من الوزارة و شخص من النقابه الهندية و شخص من وزارة الخارجية مثلاً و بيتحط في نفس الجروب البحاره الهنود اللي موجودين علي المركب اللي تم استهدافها لمتابعة الموقف و وضعهم و حالتهم و ده كان في بداية الأزمة في مارس الماضي و بعد كده اصبحوا يتواصلوا من خلال الشركة و ربان السفينه.
و في نفس الوقت شخص مخول من غرفه الازمات دي بيتواصل مع اسرة كل بحار عشان يطمنوهم و ده نفس الامر بتلاقيه بيتعمل للفلبينيين يا سادة و كل اللي في المجال البحري عارفين ما هي قوة نقابه الفلبين اللي بتمشي كلمها علي الشركات العالمية لو حد قرب من حقوق البحار الفلبيني.( نقابه الفلبين هي نقابه واحده بس تابعه لوزارة النقل مفيش العبث اللي شايفينه من كمية نقابات لا تعد و لا تحصي و كلها سبوبه و ماشية)
يعني بإختصار لو السفينة عليها تلاتة هنود، بيتم التواصل معاهم ومتابعتهم وفي نفس الوقت، بيكون فيه تواصل تاني مخصص للأهالي، عشان يطمنوهم ويعرفوهم التطورات أول بأول.
و ده جزء من دور غرفه الأزمات الخاص بحل المشاكل و المتابعه الإنسانية للعاملين و اسرهم.
طب وإحنا فين من الكلام ده؟
إحنا عندنا حالات لبحارة مصريين مفقودين من اكتوبر بالبحر الأسود و منتظرين قرار رئاسة الوزراء بعد ما عدي ٣٠ يوم و ووووو.
و عندك سفينه واقفه في السويس عليها ربان و بحاره مخدوش مرتبهم من ٣ او ٤ شهور و معندهمش بنزين عشان يشغلوا المولدات و الله اعلم بوضع أكلهم
و لازم اقولها بصراحه التلات بحاره لو كانوا فلبينيين كان زمان نقابتهم جابتلهم مرتباتهم و عيشتهم عيشه آدمية من غير شوهات زي ما هو متفق عليه في اتفاقية MLC 2006 اللي عملت عليها حلقتين في اخر ٣ سنين…..
و هنا لازم أسئل هل وضحت الثغره و الفرق في التعامل ما بين الهند و الفلبين مع بحارتهم و الفرق في التعامل عندنا يا سادة؟
بالتالي وجود نقابة بحرية حقيقية للعاملين في قطاع النقل البحري فقط (للسادة العاملين في البحر) ده مش رفاهية و لا دلع و تعدد النقابات الخاصه ده تشتيت لقوة القطاع و اهدار للعنصر البشري و حقوقة في العمل و التدريب و حقوق الدولة في تقليل عدد البطاله و زيادة دخل محفظه الدولة و دخول عمال رباط و عمال رافعات و دكاتره بشريين و منتحلين ده كله مش موجود في الدول اللي سبقتنا و لازم قانون النقابات ده يتوقف و كل اللي عندهم نقابات تحت القانون ده يتراجعوا و يتشاف وضعهم ايه!!!!!
و سامحوني علي صراحتي لان احنا مش بندور علي مصالح شخصية، من اول يوم طلعنا بدءنا نتكلم قلتها صارحه انا بدعم بلدي للرقي و الرفعه،،، هسقف للحلو و هشاور علي المساحات المحتاجه التطوير و الرقي و هطرح الحلول.
غرفة الأزمات المفروض يكون ليها دور مستمر و تكون مسؤولة عن متابعة البحارة المصريين و قت الحوادث و التنسيق مع الجهات المعنية و الوكلاء و الشركات و التواصل مع الأهالي و متابعة المفقودين و المصابين زي الفلبين و الهند.
و عشان كده بطالب بوجود غرفة أزمات بحرية دائمة، تكون موجودة و مستعدة لإستخدامها وقت الأزمات و نستغل ان معالي الفريق بيقود في جامعه الدول العربية وزارات النقل العرب و ان عندنا مكتب اقليمي للمنظمة البحرية الدولية.
و غرفة أزمات لوحدها مش كفاية لازم معاها نقابة محترمة، متخصصة للعاملين بقطاع النقل البحري التجاري، نقابة تمثل كافه الربابنة والضباط والمهندسين والبحارة اللي بيشتغلوا على السفن مش اللي بنشوفه دلوقتي من نقابات لا ترتقي ان تمثل جزيرة السيد الواقعه في رشيد بمحافظة البحيرة بنهر النيل.
مش كل شوية حد يطلع يعمل نقابة على مزاجه عشان يملأ الفراغ الموجود و لا عشان المصالح المادية اللي بتخرج من الكارنيهات و الشهادات و الاحراءات القانونية و النسبه اللي بتدخل من كل سفينه بتدخل البلد و في الآخر تبقى المسألة كلها قايمة علي المصالح و الكل بيدافع عن مصالحه بأستماته.
كل واحد من حقه يسعى لمصالحه انا مش ضد مصلحه حد و لا باصص لحد و لا عايزين منكم حاجه، لكن إحنا كمان من حقنا نبص لمصلحة بلدنا و قطاعنا و رجالة البحر المصريين اللي بيعانو من الهم ده من اكتر من ٤٠ سنه.
والموضوع مش معقول و لا ينفع يفضل بالشكل ده.
عشان كده أنا طالبت و هفضل أطالب معالي الفريق كامل الوزير ان سيادته يتنبي دعم وجود تمثيل نقابي متخصص للقطاع، في إطار القانون، بعيداً عن حالة التشتت و المصالح اللي لا بتحل و لا تربط و لا بتصلح بل بالعكس الوضع من سيء لأسوء.
لازم نقابة محترمه تخرج من الوزارة زي الدول المحترمه و يمسكها ربان بحري تجاري او كبير مهندسين من قسم التجاري منتخبين لهم سيرة ذاتية محترمه ، واجهات مشرفه ، لا عايزين منتحلين و لا عايزين نشوف المتملقين المستخبيين دلوقتي عشان اتفضحوا بمواقفهم المخزيه و منهم من يستنكر انبطاحه و مازال مستمر ليظهر شجاعته الورقية لمسح ماء الوجه…..
طب سؤال بسيط
هل طلبة الأكاديمية معاهم كارنية نقابه واحده؟؟؟ و لا معاهم كارنية لكذا نقابه؟؟؟؟
و الفلبيين اللي عندها اقوي نقابه في العالم
هي نقابه واحده بس و لا القانون متساب لكلً من هب و دب يعمل نقابه…..
سامحوني علي صراحتي بس بصراحه الوضع اصبح صعب و لازم له وقفه.
والكلام ده كله مش تقليل من أحد ، لا والله ،
لكن الانتحال و ركوب القطاع و رجاله و المكاتب الاكاديميات الوهمية و مكاتب السمسره وووووو اللي بنشوفها علي صفحات التواصل و الصحف و الاعلام لازم يكون لها حدود و سقف مش بالمنظر الفج ده اللي بيشوهنا و بيشوه الدولة كلها و كل مجهود محترم بيتعمل لصالح رفعه مصر و شعبنا .
و هفضل أقولها بأعلي صوت إحنا دولة كبيرة بتعمل مجهود محترم جداً في تطوير قطاع النقل البحري في البنية التحتية.
عندنا خطة استراتيجية لتحويل مصر لمركز عالمي للنقل واللوجستيات.
عندنا أرصفة و موانئ جديدة اتبنت و موانئ قديمة اتوسعت و الاعماق اتعمقت في موانيء كتير ل ٢٥ متر و عندنا ربط بين موانئ البحر الأحمر والبحر المتوسط و شبكات سكك حديدية بتربط الموانئ ببعضها و موانئ جافة و مناطق لوجستية و ميناء طابا العريش و الربط اللي ما بينهم و ٨ ممرات لوچيستية.
وعندنا شركات عالمية و دولية دخلت تشتغل و تستثمر و تدير في الموانئ المصرية و منطقة إقتصادية بتكبر و بتوسع و كنت لسه بطالب بأن لازم يكون في ادارة موحدة لكافة الموانيء المصرية.
يعني فيه شغل كبير و محترم بيتعمل على الأرض و محدش يقدر ينكره و اللي ينكره هو جاحد و أعمي و معندوش لا وعي و لا ضمير.
لكن يا جماعة الخير، التنمية الفتره السابقه كان معظمها بيزنس و استثمارات و بنية تحتية لاننا كنا بنسابق الزمن للوصول لتأمينات و اهداف محدده قبل ٢٠٢٥ و علي يقين ان الفتره القادمة هيتم التركيز أكتر علي أهم عنصر في التنمية و هو العنصر البشري.
العنصر البشري في قطاع النقل البحري التجاري هو الربان و كبير المهندسين و المرشدين والضابط والمهندس والبحّار، الإنسان اللي بيشتغل في البحر و بيواجه المخاطر و بيرفع اسم مصر في الشركات و الأساطيل العالمية و اللي من غيرهم الإقتصاد العالمي كله يقف.
وده العنصر اللي لازم نهتم بيه و نحافظ عليه، لأنه جزء أساسي من قوة دولتنا المصرية و قدراتها و مصدر دخل قوي لمحفظه الدولة.
وعشان كده، مطالبنا واضحة و بسيطه جداً و علي يقين تام انها هتتنفذ بإذن الله عشان بلدنا:
أولاً: وجود غرفة أزمات بحرية مصرية دائمة، لمتابعة أي حادث يتعرض له بحّار مصري في أي مكان في العالم، سواء كان على سفينة مصرية أو أجنبية ، لحل مشاكلهم و تخليص اوراقهم و التواصل مع الجهات المعنية والأهالي لطمئنتهم لحين انتهاء الأزمة.
ثانياً: وجود نقابة مهنية حقيقية مستقلة و متخصصة للعاملين على السفن التجارية تنبثق من رحم وزارة النقل، يمثلها أبناء المهنة الحقيقيين من القسم التجاري ربان او كبير مهندسبن و تكون صوت حقيقي لرجالة البحر المصريين.
وفي النهاية، بكرر شكري و تقديري لفخامة الرئيس و لكل رجال اجهزتنا المخلصين علي أنهم ديما بيفتحوا لنا المجال لطرح آرائنا البناءة لنساعد في الحفاظ و ارتقاء مصرنا و كل الشكر و التقدير لمعالي الفريق كامل الوزير على تكريمه لأبطال سفينة وادي العرب و بقول لكل فرد من أفراد طاقمها الف حمد لله على سلامتكم يا أبطال ، أزمة كبيرة و حقيقية لا يعلمها سوي من عاشها.
حفظ الله مصر و حفظ الله كل رجال البحر المصريين الذين يجابهوا اصعب التحديات يومياً في كل مكان في العالم.

